2026 உயர்தரப் பரீட்சையை ஒத்திவைக்கக் கோரிய மனு: ஜூலை 23ஆம் தேதி நீதிமன்றம் தீர்மானம் அறிவிக்கும்
2026 ஆம் ஆண்டுக்கான கல்விப் பொதுத் தராதர உயர்தர (A/L) பரீட்சையை ஒத்திவைத்து உத்தரவிடுமாறு கோரி தாக்கல் செய்யப்பட்ட மனு தொடர்பாக மேன்முறையீட்டு நீதிமன்றம் முக்கிய உத்தரவு ஒன்றை இன்று (ஜூலை 16) பிறப்பித்துள்ளது.
அதன்படி, குறித்த மனுவை விசாரணைக்கு ஏற்றுக்கொள்ளலாமா அல்லது இல்லையா என்பது தொடர்பான தீர்மானம் 2026 ஜூலை 23ஆம் தேதி அறிவிக்கப்படும் என நீதிமன்றம் தெரிவித்துள்ளது.
இந்த மனு, 2026 உயர்தரப் பரீட்சைக்கு தோற்றவுள்ள மாணவ, மாணவிகள் குழுவொன்றினால் தாக்கல் செய்யப்பட்டதாகும். இன்று (16) மனு விசாரணைக்கு அழைக்கப்பட்டபோது, மனுதாரர் தரப்பும் சட்டமா அதிபர் தரப்பும் முன்வைத்த சமர்ப்பணங்களை பரிசீலித்த பின்னர், மேன்முறையீட்டு நீதிமன்ற நீதியரசர்கள் குழாம் இந்த உத்தரவை வழங்கியது.
இதற்கிடையில், 2026 ஆம் ஆண்டுக்கான கல்விப் பொதுத் தராதர உயர்தரப் பரீட்சை ஆகஸ்ட் 10ஆம் தேதி ஆரம்பமாகி செப்டம்பர் 5ஆம் தேதி வரை நடைபெறவுள்ளது. இதற்கான திருத்தப்பட்ட பரீட்சை நேர அட்டவணையையும் பரீட்சைகள் திணைக்களம் ஏற்கனவே வெளியிட்டுள்ளது.
தற்போது, உயர்தரப் பரீட்சை திட்டமிட்டபடி நடைபெறுமா அல்லது மனு விசாரணைக்கு ஏற்கப்பட்டு மேலதிக நடவடிக்கைகள் எடுக்கப்படுமா என்பது குறித்து ஜூலை 23ஆம் தேதி வெளியாகும் நீதிமன்றத்தின் தீர்மானம் முக்கியத்துவம் பெறுகிறது.
